Í kringum bóndadag er þorramatur sjálfsagt kynntur fyrir börnunum í flestum leikskólum á landinu. Af því að þessi matur er frekar ókunnugur fyrir börnin virkar það sérstaklega vel að nota ljósmyndir - og gaffal :o) með þegar við tölum og syngjum um hann. Hér eru börnin í Stubbaseli að "smakka" á matnum.
Hjá okkur á Urðarhóli notum við alltaf lagið "Ó, hangikjöt", sem sungið er eftir sömu laglínu og "A-ramsa-sa". Textinn eftir Guðlaugu Kristjánsdóttur (Kópasteini):
Ó, hangikjöt
Ó, hangikjöt, ó, hangikjöt,
og rófustappa, grænar baunir, súrhvalur!
Ó hangikjöt, ó, hangikjöt,
og sviðasulta, hrútspungar og harðfiskur!
Og hákarl, og flatbrauð!
Mér finnst svo gott að borða allan þennan mat!
Og hákarl, og flatbrauð!
Mér finnst svo gott að borða allan þennan mat!
Á myndskeiðinu hér fyrir neðan erum við að leika okkur með að rugla erindunum með því að draga spjöld fyrir næsta "rétt". Það er alltaf mjög gaman - og furðulegt hvernig hákarlinn lendir alltaf á réttum stað :)
Súrsaðir pungar
 |
Í Hæðabóli, Lundabóli og e.t.v. fleiri leikskólum í Garðabæ er sungið eftirfarandi lag eftir söngsveitina Randver (við laglínuna "Allur matur verður að fara").
Súrsaðir pungar, svið og læri,
skyrhákarl og vökvinn tæri.
Et og drekk, et og drekk
af andans list og eftir smekk.
Á þorrablóti er gleði og gaman
Á heimasíðu Hæðabóls sá ég ennig skemmtilega breytingu á jólalagi í þorralag:
Á þorrablóti er gleði og gaman þei, þei, þó.
Þá syngja allir krakkarnir og borða þorramat,
þá mun ríkja gleði og gaman, allir hlæja og syngja saman,
þei, þei, þó.
Hugmynd: Ingibjörg Gunnarsdóttir, leikskólastjóri.
Það væri gaman að heyra frá fleiri leikskólum varðandi það hvernig hægt er að kynna þorramatinn á sem skemmtilegastan hátt.