 |
Bergrún Ísleifsdóttir, leikskólakennari á leikskólanum Álfaheiði, hefur þróað þessa frábæru og áhrifaríku aðferð til að vinna með skilning barnanna á söngtexta. Hún kallar aðferðina "teiknitúlkun". Eins og orðið bendir til teikna börnin myndir til að túlka söngtextann, en jafnframt felst aðferðin í ákveðnu samskiptaferli í sambandi við þá vinnu.
Þessu samskiptaferli má skipta í þrjá meginþætti:
- Skilningur textans
- Hvað þýða orðin?
- Hvað þýðir setningin?
- Allar tillögur frá börnunum velkomnar og viðurkenndar
 |
- Hugmyndir að teiknitúlkun
- Hvernig getum við teiknað þessa setningu?
- Allar tillögur velkomnar og viðurkenndar
- Sameiginleg ákvörðun tekin um hvað á að teikna
- Að teikna og syngja
- Hver vill teikna það sem var ákveðið?
- Hvernig ætlar þú að teikna það?
- Einn teiknar og hinir syngja á meðan
Bergrún útskýrir hugmyndina í aðferðinni á eftirfarandi hátt:
Með aðferðinni fá börnin tækifæri til að tjá hugmyndir sínar og koma hugsunum sínum í orð og myndir. Þar með gefst kennaranum tækifæri til að skyggnast inn í hugarheim barnanna og auka skilning sinn á því hvernig börn hugsa.
Börnin fá tækifæri til að taka þátt í skapandi ferli, gleðjast yfir eigin sköpunarkrafti, skilja textann eða orðin sem þau syngja og tjá upplifun sína í gegnum myndsköpun. Barnið fær einnig tækifæri til að eiga jákvæð og uppbyggileg samskipti, deila skoðunum sínum og hugmyndum og öðlast skilning á rituðu máli. Reynslan sýnir að eftir að aðferðinni hefur verið beitt á ákveðinn söngtexta kunna börnin textann vel og skilja hann betur. Einnig örvar þessi vinna þau til að spyrja hvað orðin merkja í öðrum söngtextum og sögum.
Þeir sem hafa áhuga á því að fá nánari útlistun á því hvernig best er að útfæra þessa þrjá fasa í teiknitúlkuninni, geta haft samband við Bergrúnu gegnum leikskólann Álfaheiði.
